سیرت محمد ص

"نبی کریم صلی اللہ و علیہ وآلہ وسلم کی سیرت طیبہ تاریخ بشریت میں گزرنے والے انبیاء و المرسلین اور نوابغ و مصلحین کی بہ نسبت ہر حوالے سے امتیاز کی حامل ہے - آپ کی حیات طیبہ کے آغاز سے لیکر وفات تک کے مراحل کا جائزہ لیا جائے تو آپ جیسی کامل ، واضح اور روشن کوئ ہستی نہیں ملتی، نہ کسی اور کو اتنے روشن زاویے سے ایسی حیات نصیب ہوئ ہے-

1- دنیا کی تاریخ میں نوابغ روزگار شخصیات کے والدین کا پتہ نہیں چلتا جب کہ آپ کے والدین عبداللہ رض اور آمنہ رض کا سلسلہ نسب کئ پشتوں تک مشہور و معروف اور غیر متنازعہ شخصیات سے ملتا ہے-

2- انسانیت اور بشریت کے آسمان پر آپ صلی اللہ و علیہ وآلہ وسلم کی حیات طیبہ کا ہر پہلو تمام زاویوں سے واضح ، روشن اور درخشاں ستارے کی مانند نظر آتا ہے جب کہ آپ کی سیرت میں کسی قسم کی قصہ و کہانی اور افسانہ نامی کوئ چیز نہیں ملتی-

3- آپ کی حیات طیبہ کے ابتدائ دور سے لیکر دعوائے نبوت تک کے دورانیے میں کسی بھی وقت معاشرے کی برائیوں ، خرابیوں اور دلدلوں کے علاوہ غیر معقول اقوال و کردار کی محافل و مجالس سے آپ نے خود کو ہر سطح پر دور رکھا -

4- دعویٰ نبوت سے وفات تک تبلغ دین کے تمام پہلو جن میں قیام و جہاد بھی شامل ہے کو عملی جامہ پہنانے 

کے دوران پیش آنے والی مشکلات و پریشانیوں میں فتح و شکست کے مواقع پر آگے بڑھنے اور پیچھے ہٹنے کے تمام واقعات و حالات میں آپ صلی اللہ و علیہ وآلہ وسلم ہمت و استقامت کے ساتھ علمی و فلسفیانہ اصولوں پر قائم و دائم نظر آتے ہیں اگر کہیں کوئ غیبی امداد حاصل ہوئ تو وہ آپ کی جنگی اصول و حکمت عملی سے متصادم نظر نہیں آتی -

5- آپ کے تیس سالہ دور رسالت میں دعوت کا مرکزی اور بنیادی نکتہ عقل ، منطق اور استدلال سے بھر پور نظر آتا ہے کیونکہ کسی مقام اور مرحلے پر آپ نے اپنے مقام و منصب کی بنیاد پر فریق مخالف کو خاموش کرنے کی خاطر اپنے نظریے کو مسلط کئے جانے سے متعلق کوئ کردار ادا نہیں کیا -"

( آغا علامہ سید علی شرف الدین  موسوی بلتستانی)